Доктор Чибишев: Одлуката за вакво укинување на рестрикциите е крајно хазардерска и политичка, а не стручна

Република Македонија во последните три месеци живее во специфична состојба која јас ја нарекувам „продолжена стресна состојба“. Поголемиот број граѓаните се крајно загрижени за своето и здравјето на своите семејства, посебно за повозрасните членови на семејтвото и оние кои боледуваат од хронични болести како што се покачен крвен притисок, срцеви и белодробни заболувања и шекерна болест. Граѓаните, барем поголемиот број, преживеаја долги денови на полициски час, ограничено движење, неможност слободно да се движат и да ги практикуваат секојдневните активности.

Ова во изјава за КУРИР го истакнува професор доктор Андон Чибишев.

На прашањето: „Дали се избрза со укинување на полицискиот час и отворање на угостителските објекти“, тој вели:

„Состојбата беше до некаде смирена и бројот на новозаразени почна да се намалува и во извештаите на надлежните институции да домираат бројките на пациентите кои ја победиле болеста. Меѓутоа, во последните дваесетина дена состојбата повторно почнува да ескалира, бројките на новозаразени да се зголемува, бројот на починати исто така. И, во една таква специфична новонастаната состојба која воопшто не наликува на завршување на епидемијата, техничката влада на предлог на Комисијата за заразни болести  носи крајно хазардерска, политичка, а не стручна одлука со која ги укинува рестрикциите за движење на граѓаните (со неразбирливо образложение, дека и до сега тие рестикции никој не ги почитувал ?), носат одлука да се отворат угостителските објекти и на крајот најчудната одлука, го враќаат во функција бесплатниот превоз за пензионерите, кои до пред два дена беа дел од популацијата кои без најограничени во слободното движење во тек на денот. Моето мислење е дека ваквата одлука е крајно неиздржана, непромислена и штетна по здравјето на граѓаните, истакна Чибишев.

„Последиците на ваквата непромислена одлука според мене ќе имаат непредвидливи и несогледливи  последици  по здравјето на граѓаните. Тоа веќе секојдневно го гледаме и го слушаме. Бројот на новозаразени расте, бројот на починати расте, Македонија е меѓу државите во регионот која има најголем број на новозаразени на еден милион жители и смртност која е загрижувачка, околу 5,5 %. За споредба смртноста во државите во опкружувањето е далеку пониска од таа кај нас. (Србија околу 2 %), рече Чибишев во изјава за КУРИР.

„Несериозно  е да  бараш од граѓаните да почнат да се навикнуват на т.н. нова нормалност со која практички треба да се навикнеме на секојдневие во кое постојано треба да стрепиме дали ние или некој од нашите најблиски ќе се разболат, а за исходот од инфекцијата не сакам да коментирам. Новата нормалност за мене е разбирлива, меѓутоа, ако немаме новозаразени. Се друго е  обид на надлежните да не убедат дека треба да почнеме да се навикнуваме на живот во кој што ќе функционираме  виртуелно,  ќе живееме и ќе работиме вообичаено, а секојдневно наместо да слушаме дека бројот на новозаразени опаѓа или  дека нема веќе заразени, ние слушаме дека бројот постојано се зголемува, бројот на хоспитализирани се зголемува, бројот на новозаразени е поголем од бројот на излекувани и  дека бројот на починати загрижувачки се зголемува. На крајот би сакал да прашам дали тие кои не повикуваат да се адаптираме на новата нормалност, помислуваат на здравствените работници,  полициските службеници и сите други кои во овие три месеци вонредна состојба го понесоа најголемиот товар на кризата, дали помислуваат на нивните семејства и блиски кои секојдневно живеат во страв за нивното здравје и животи. Ако животот продолжи во ваква „нормалност“, во која секојдневно имаме голем број на новозаразени, најавата за брзи избори пред смирување на епидемијата  за мене е несфатлива, неразбирлива и крајно неодговорна, оценува професор доктор Чибишев во изјавата за КУРИР.

Извор: Курир

Утре ќе се одлучува за продолжување на вонредната состојба, неизвесен е датумот за избори

Советот за безбедност в сабота на пладне во претседателската вила „Водно“ ќе одлучува за евентуалното продолжување на вонредната состојба. Сабота е последниот ден кога истекува третата – двонеделната вонредна состојба што ја прогласи претседателот Стево Пендаровски на 15 мај.

Пендаровски, како што потврдија за МИА од Кабинетот на шефот на државата, ќе го свика Советот за безбедност в сабота, без оглед дали ќе има ново барање од Владата за продолжување на вонредната состојба.

Премиерот Оливер Спасовски вчера изјави дека Владата до крајот на неделата ќе одлучи дали ќе има прогласување нова вонредна состојба која, како што рече, е потребна пред сé за спроведување на економските мерки.

-Ако имаме потреба врз основа на анализите дека треба да се прогласи вонредна состојба уште некој ден за справување со економските последици, тоа ќе го направиме и кога ќе заврши вонредната состојба, по 22 дена ќе се одржат изборите, истакна Спасовски по посетата на Карбинци.

Партиите, пак, се уште се без договор за датум за избори. Нема најава за нова лидерска средба кај претседателот Стево Пендаровски, откако на двете претходни не беше постигнат договор за терминот за изборното соочување.

Според претседателот на СДСМ Зоран Заев, државата има потреба од избори во првиот можен термин за да го дочекаме новиот бран на коронавирусот на есен целосно подготвени.

-На граѓаните и на државата им требаат институции со целосен легитимитет за да создадат услови за новата нормалност, со полн капацитет да го заштитиме здравјето на граѓаните и да ја рестартираме македонската економија, објави Заев на фејсбук.

Ставот на опозициската ВМРО-ДПМНЕ е непромент – брзи избори не се прифатливи и најважно е здравјето на граѓаните. СДСМ, како што велат, сака избори по секоја цена само за да го намали неизбежниот пораз.

Тие не се против избори, но во соодветен термин. Тоа, според нив, би било на крајот на август или почетокот на септември. Потврдуваат дека постои канал на комуникација, но епилогот засега е неизвесен.

-Како што кажа и претседателот Мицкоски, канал за комуникација постои. Ние остануваме на нашиот став и тоа е непроменет дека сепак треба да се створат услови за избори. Здравјето на граѓаните е пред се, но да почекаме наредниот период да видиме како ќе се развиваат настаните вклучително и здравствената ситуација, вели портпаролот на ВМРО-ДПМНЕ Димче Аровски. (МИА)

„Пошта“ тоне во милионски загуби, а директорите си делеле БОНУСИ од по 5.700 евра

Државниот завод за ревизија открил низа на нерегуларности во работењето на АД Пошта. Ревизорите констатирале дека во услови кога Поштата работи со загуба, Надзорниот одбор одобрил склучување на договори за менаџерско осигурување за седуммина членови на Управниот и на Надзорниот одбор.

Според извештајот, платено е менаџерско осигурување за период од 1.04.2018 до 1.04.2019 година во вкупен износ од 2.760.000 денари, или околу 45.000 евра. Овие директори ги бира Владата, тие примаат плата, а ако одобри Надзорниот одбор може да склучи и договор и за нивно менаџерско осигурување со осигурителна компанија што ќе понуди најповолни услови.

АД Пошта работела со загуба, која до крајот на 2018 година изнесувала околу 10 милиони евра, од кои само во 2018 година се направени над 2,5 милиони евра, а остатокот е од претходните години, што говорело дека финансиската состојба на друштвото е значително влошена.

Тоа, пак, според прописите, укажувало дека во такви услови не требало да се склучуваат договори за осигурување на менаџерите, односно дека трошоците за менаџерското осигурување не биле целисходни.

Ревизорите одговорноста ја лоцирале кај Фадис Реџепи, генерален директор и претседател на УО од 1.09 2014 до 31.08.2018 и кај Ејуп Рустеми кој е генерален директор и претседател на УО од 1.09.2018 година.

Популарно